1ܠܵܐ ܪܵܒܵܐ ܡܲܠܦܵܢܹ̈ܐ ܗܵܘܝܼܬܘܿܢ؛ ܐܵܚܘܿܢܘܵܬܝܼ̈؛ ܟܲܕ ܗܵܘܝܼܬܘܿܢ ܒܝܼܕܲܥܝܵܐ ܕܕܝܼܘܵܢ ܒܘܼܫ ܙܵܘܕܵܐ ܒܸܬ ܩܵܒ݁ܠܵܚ. 2ܣܵܒܵܒ ܪܵܒܵܐ ܒܸܓ̰ܪܵܛܵܐ ܝܘܵܚ ܟܠܲܢ؛ ܐܸܢ ܐ݇ܢܵܫܵܐ ܒܗܹܡܸܙܡܵܢ ܠܵܐ ܓ̰ܵܪܸܛ؛ ܐܵܗܵܐ ܐ݇ܢܵܫܵܐ ܟܵܡܝܼܠ ܝܼܠܹܗ؛ ܕܡܵܨܹܐ ܙܲܒܛܸܢ ܐܘܼܦ ܠܟܠܹܗ ܦܲܓܼܪܹܗ. 3ܐܝܼܢܵܐ ܐܸܢ ܠܲܥܡܹ̈ܐ ܒܦܘܼܡܵܐ ܕܣܘܼܣܵܘܵܬܹ̈ܐ ܒܸܕܪܵܝܵܐ ܝܘܵܚ؛ ܕܦܵܝܫܝܼ ܙܲܒܛ ܐܸܠܲܢ؛ ܟܠܹܗ ܓܘܼܫܡܵܝ ܡܲܕܘܼܪܹܐ ܝܘܵܚ. 4ܗܵܐ؛ ܐܘܼܦ ܓܵܡ̈ܝܼܹܐ ܕܝܼܢܵܐ ܗܲܕܟܼܵܐ ܓܘܼܪܹ̈ܐ؛ ܘܠܘܼܒܠܹܐ ܡ̣ܢ ܦܵܘܚܹ̈ܐ ܩܸܫܝܹ̈ܐ؛ ܡ̣ܢ ܣܵܘܟܵܢ ܪܵܒܵܐ ܙܥܘܿܪܵܐ ܟܹܐ ܦܵܝܫܝܼ ܡܘܼܕܸܪܹܐ؛ ܠܗ̇ܝ ܕܘܼܟܬܵܐ ܕܒܲܥܝܹܐ ܪܸܙܵܝܹܗ ܕܗ̇ܘ ܕܬܲܓܒܸܪ. 5ܗܲܕܟܼܵܐ ܐܘܼܦ ܠܸܫܵܢܵܐ ܗܲܕܵܡܵܐ ܙܥܘܿܪܵܐ ܝܠܹܗ؛ ܘܟܹܐ ܫܬܲܒܼܗܸܪ ܡܸܢܕܝܵܢܹ̈ܐ ܓܘܼܪܹ̈ܐ. ܗܵܐ؛ ܢܘܼܪܵܐ ܙܥܘܿܪܵܐ ܡܲܝܫܵܬܹ̈ܐ ܟܡܵܐ ܓܘܼܪܹ̈ܐ ܟܹܐ ܬܵܦܹܐ؛ 6ܘܠܸܫܵܢܵܐ ܢܘܼܪܵܐ ܝܠܹܗ؛ ܘܥܵܠܡܵܐ ܕܥܵܘܠܵܐ. ܠܸܫܵܢܵܐ ܓܵܘ ܗܲܕܵܡܲـ̈ܢ ܝܼܠܹܗ ܗ̇ܘ ܕܟܹܐ ܠܲܟܸܢ ܠܟܠܹܗ ܦܲܓܼܪܲܢ؛ ܘܟܹܐ ܡܲܠܗܹܐ ܠܟ̰ܲܪܚ ܕܒܪܝܼܬܵܐ؛ ܘܡܘܼܠܗ݇ܝܼܵܐ ܝܠܹܗ ܐܘܼܦ ܗ̇ܘ ܡ̣ܢ ܓܹܗܲܢܵܐ. 7ܣܵܒܵܒ ܟܠܵܝܗܝ ܟܝܵܢܹ̈ܐ ܕܗܲܝܘܵܢܹ̈ܐ؛ ܘܕܛܲܝܪܹ̈ܐ؛ ܘܕܪܸ̈ܓ̰ܒܹܐ؛ ܘܕܪ̈ܲܚܫܵܐ ܕܝܵܡܵܐ؛ ܟܹܐ ܦܵܝܫܝܼ ܙܘܼܒܛܸܢܹܐ؛ ܘܦܝܼܫܹܐ ܝܢܵܐ ܙܘܼܒܛܸܢܹܐ ܠܟܝܵܢܵܐ ܕܐ݇ܢܵܫܘܼܬܵܐ. 8ܐܝܼܢܵܐ ܠܸܫܵܢܵܐ ܟ̰ܘܼ ܒܲܪܢܵܫܵܐ ܠܹܐ ܝܠܹܗ ܡܸܨܝܵܐ ܕܙܲܒܛܸܢܹܗ. ܒܝܼܫܬܵܐ ܠܵܐ ܫܠܝܼܬܵܐ ܝܠܹܗ؛ ܡܸܠܝܵܐ ܣܲܡܵܐ ܕܡܵܘܬܵܐ. 9ܒܝܼܹܗ ܒܵܪܘܿܟܼܹܐ ܝܘܵܚ ܠܡܵܪܝܵܐ ܘܒܵܒܵܐ؛ ܘܒܝܼܹܗ ܒܸܠܝܵܛܵܐ ܝܘܵܚ ܠܒܢܲܝ̈ܢܵܫܵܐ ܕܒܕܡܘܼܬܵܐ ܕܐܲܠܵܗܵܐ ܒܸܪܝܹܐ ܝܢܵܐ. 10ܗܲܪ ܡܗ̇ܘ ܦܘܼܡܵܐ ܟܹܐ ܦܵܠܛܝܼ ܠܵܘܛܵܬܹ̈ܐ ܘܒܘܼܪ̈ܟܵܬܹܐ. ܠܹܐ ܝَܠܵܗ̇ ܘܵܓ̰ܸܒ؛ ܐܵܚܘܿܢܘܵܬܝܼ̈؛ ܕܐܲܢܹܐ ܗܲܕܟܼܵܐ ܗܵܘܝܼ. 11ܟܹܐ ܡܵܨܝܵܐ ܥܲܝܢܵܐ ܗܲܪ ܡ̣ܢ ܚܲܕَ ܦܘܼܡܵܐ ܦܵܠܛܵܐ ܡ̈ܝܼܵܐ ܚܸܠܝܹ̈ܐ ܘܡܲܪܝܼܪܹ̈ܐ؛ 12ܝܼܢ ܟܹܐ ܡܵܨܹܐ؛ ܐܵܚܘܿܢܘܵܬܝܼ̈؛ ܐܝܼܠܵܢܵܐ ܕܬܹܐܢܵܐ ܙܲܝܬܹ̈ܐ ܥܵܒܸܕ؛ ܓܸܦܬܵܐ ܬܹܐܢܹ̈ܐ؛ ܗܲܕܟܼܵܐ ܡ̈ܝܼܵܐ ܫܘܿܪ ܠܹܐ ܡܵܨܝܼ ܕܥܵܒܼܕܝܼ ܚܸܠܝܹ̈ܐ. 13ܡܵܢܝܼ ܝܠܹܗ ܡܸܢܵܘܟܼܘܿܢ ܥܵܩܸܠܕܵܪ ܘܬܘܼܥܠܡܵܐ؛ ܡܲܚܙܹܐ ܦܘܼܠܚܵܢܘܼ̈ܗܝ ܡ̣ܢ ܚܕܵܪܹ̈ܐ ܫܵܦܝܼܪܹ̈ܐ؛ ܒܥܵܩܸܠܕܵܪܘܼܬܵܐ ܡܵܟܝܼܟܼܬܵܐ. 14ܐܝܼܢܵܐ ܐܸܢ ܒܲܚܸܠܵܢܘܼܬܵܐ ܡܲܪܝܼܪܬܵܐ ܐܝܼܬ ܓܵܘܵܘܟܼܘܿܢ؛ ܝܲܢ ܡܲܩܲܪܵܨܘܼܬܵܐ ܒܠܸܒܵܘ̈ܟܼܘܿܢ؛ ܠܵܐ ܚܵܬܪܝܼܬܘܿܢ ܘܕܵܓܠܝܼܬܘܿܢ ܥܲܠ ܣܲܪܲܣܬܘܼܬܵܐ. 15ܐܵܗܵܐ ܥܵܩܸܠܕܵܪܘܼܬܵܐ ܡ̣ܢ ܥܸܠܸܠ ܠܹܐ ܝَܠܵܗ̇ ܒܸܨܠܵܝܵܐ؛ ܐܸܠܵܐ ܐܲܪܥܵܢܵܝܬܵܐ ܝَܠܵܗ̇؛ ܢܲܦ̮ܫܵܢܵܝܬܵܐ ܘܕܲܝܘܵܢܵܝܬܵܐ. 16ܣܵܒܵܒ ܐܲܝܟܵܐ ܕܐܝܼܬ ܒܲܚܸܠܵܢܘܼܬܵܐ ܘܡܲܩܲܪܵܨܘܼܬܵܐ؛ ܬܵܡܵܐ (ܐܝܼܬ) ܐܘܼܦ ܚܒܼܵܛܵܐ ܘܟܠ ܡܸܢܕܝܼ ܣܸܪܝܵܐ. 17ܐܝܼܢܵܐ ܥܵܩܸܠܕܵܪܘܼܬܵܐ ܕܡ̣ܢ ܥܸܠܸܠ ܩܵܕ݇ܡܵܝܬܵܐ ܕܟܼܝܼܬܵܐ ܝَܠܵܗ̇؛ ܗ̇ܝܓܵܗ ܡܠܝܼܬܵܐ ܫܠܵܡܵܐ؛ ܡܵܟܝܼܟܼܬܵܐ؛ ܩܵܒܠܵܢܬܵܐ؛ ܡܠܝܼܬܵܐ ܪ̈ܲܚܡܹܐ ܘܛܥܘܼܢܝܵܬܹ̈ܐ ܛܵܒܼܹ̈ܐ؛ ܕܠܵܐ ܕܘܼܒܵܪܘܼܬܵܐ؛ ܘܦܵܬܵܐ ܠܹܐ ܚܵܙܝܵܐ. 18ܐܝܼܢܵܐ ܛܥܘܼܢܝܵܬܹ̈ܐ ܕܙܲܕܝܼܩܘܼܬܵܐ ܒܫܲܝܢܵܐ ܟܹܐ ܦܵܝܫܝܼ ܙܸܪܥܝܹܐ ܒܕܵܐܢܝܼ ܕܥܵܒܼܕܝܼ ܫܠܵܡܵܐ.